ព្រះសីហនុ៖ ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ សម្តេចក្រឡាហោម ស ខេង បានលើកឡើងថា សមត្ថកិច្ចចិនបានស្នើសុំភាគីកម្ពុជាដើម្បីអាចចាប់ខ្លួនជនជាតិចិនដែលប្រព្រឹត្តបទល្មើសដោយខ្លួនឯង ដោយមិនឱ្យភាគីកម្ពុជាធ្វើនោះទេនៅលើទឹកដីកម្ពុជានោះ តែត្រូវបានភាគីកម្ពុជាបដិសេធ។

ថ្លែងក្នុងពិធីបិទសន្និបាតបូកសរុបលទ្ធផលការងារ និងទិសដៅបន្ដរបស់រដ្ឋបាលខេត្តព្រះសីហនុ នៅថ្ងៃពុធ ទី០៩ ខែមីនា ឆ្នាំ២០២២ សម្តេចក្រឡាហោម ស ខេង បានលើកឡើងថា ការអនុញ្ញាតឱ្យប៉ូលិសចិនចូលមកចាប់ជនជាតិចិនដែលប្រព្រឹត្តិខុសលើទឹកដីកម្ពុជាគឺនឹងធ្វើឱ្យប៉ះពាល់ដល់អធិបតេយ្យភាពរបស់កម្ពុជា។

សម្តេចក្រឡាហោមថ្លែងថា៖ «បើយើងផ្តល់អធិបតេយ្យភាពនេះទៅឱ្យចិន វាក៏ត្រូវឱ្យទៅប្រទេសផ្សេងទៀតដែរ ដែលកំពុងតែមានការិយាល័យសហប្រតិបត្តិការជាមួយកម្ពុជាសព្វថ្ងៃនេះ មានប្រទេសមួយចំនួន មិនតិចប៉ុន្មាននោះទេ»។

បើតាមសម្ដេចក្រឡាហោម ក្រោយមានការបកស្រាយបែបនេះភាគីចិនក៏បានទទួលយល់ព្រមនិងឯកភាពផងដែរ៕